HAYASTAN.PRO

Վիրուսաբանը ժխտել է COVID-19-ի արհեստական ծագման հնարավորությունը



CGTN-ը հաղորդում է, որ Ուհանի վիրուսաբանության ինստիտուտի ղեկավար Յուան Չժիմինը հայտարարել է՝ գիտնականները արհեստականորեն նոր տիպի կորոնավիրուսի նման վիրուս ստեղծելու  համար բավականաչափ գիտելիքներ չունեն։

«Ես երբեք չեմ հավատա, որ մարդկությունն արդեն նման վիրուս սինթեզելու համար բավականաչափ գիտելիքների է տիրապետում»,- ասել է Չժիմինը։
Նրա խոսքով՝ կորոնավիրուսի դեպքում դրա արհեստական ծագումը մատնանշող որևէ վկայություն չկա։
Չժիմինը պարզաբանել է, որ ինստիտուտի մասնագետները գիտեն, թե ինչ հետազոտություններ են իրականացվում և պահպանում են փորձանմուշների հետ վարվելու խիստ կանոնակարգը։ 
Հունվարի վերջին կորոնավիրուսային վարակի հնարավոր արհեստական ծագման մասին հայտնել էր հանրապետական սենատոր Թոմ Քոթթոնը։ Նա նշել էր, որ Ուհանում է գտնվում «ՉԺՀ-ի միակ կենսաանվտանգության չորրորդ մակարդակի սուպերլաբորատորիան, որն աշխատում է աշխարհի ամենամահացու պաթոգեն միկրոօրգանիզմների հետ»։

Նախօրեին վիրուսի՝ Ուհանի լաբորատորիայից ծագած լինելու վարկածը հնչեցրել էր նաև ֆրանսիացի վիրուսաբան, Նոբելյան մրցանակի դափնեկիր Լյուկ Մոնտանիեն։
Նրա նշել էր, որ չի հավատում, այն վարկածին, համաձայն որի՝ կորոնավիրուսը տարածվել է շուկայում վաճառվող վայրի կենդանիներից։
«Դա գեղեցիկ առասպել է, դա հնարավոր չէ։ Վիրուսը դուրս է եկել Ուհանի լաբորատորիայից»,- պնդել է վիրուսաբանը։
Ըստ գիտնականի՝ նոր կորոնավիրուսն իր մեջ ՄԻԱՎ-ի տարրեր է պարունակում։ Լյուկ Մոնտանիեն ավելացրել է, որ ինքն առաջինը չէ, որն ուսումնասիրել է վիրուսի գենոմը և հայտնաբերել դրա կապը մարդու իմունային անբավարարության վիրուսի հետ։
Նոբելյան դափնեկրի համոզմամբ՝ հնարավոր է՝ այն տեղի է ունեցել ՄԻԱՎ-ից պաշտպանող պատվաստանյութ ստեղծելու փորձի ընթացքում։


OTHER NEWS
© 2020 HAYASTAN.PRO | All Rights Reserved. HAYASTAN.PRO