HAYASTAN.PRO

Արցախի նախագահը նվեր ստացած Տոյոտա LC 200 մակնիշի մեքենան փոխանցել է պետական հաշվեկշիռ



Արցախի նախագահ Արայիկ Հարությունյանը ռուսաստանաբնակ հայ գործարարից Տոյոտա LC 200 մակնիշի մեքենա է նվեր ստացել, որն  արդեն գտնվում է պետական հաշվեկշռում։ Այս  մասին տեղեկանում ենք նախագահի գրառումից, որում ասվում է․ 
«Հարգելի՛ հայրենակիցներ

Օրերս ռուսաստանաբնակ գործարար Աշոտ Օրդուխանյանի կողմից նվեր եմ ստացել լուսանկարում ներկայացված Տոյոտա LC 200 մակնիշի մեքենան՝ ծառայողական նպատակով օգտագործելու համար: Այն արդեն գտնվում է պետական հաշվեկշռում, և դրանից օգտվելու եմ ըստ անհրաժեշտության՝ մայրաքաղաքից դուրս աշխատանքային այցերի դեպքում, իսկ էլեկտրամոբիլը շարունակելու է ծառայել որպես հիմնական փոխադրամիջոց:

Երբ Աշոտը հայտնեց ինձ նվերի մասին, իհարկե, ցանկությունս էր, որ նա այդ մեքենայի ձեռքբերման համար նախատեսված միջոցներն ուղղեր մեր երկրում սոցիալական որևէ ծրագրի իրականացմանը: Սակայն քանի որ մեքենան արդեն գնել էր այդ նպատակով, բարեկամաբար որոշեցինք, որ ես ընդունեմ թանկարժեք նվերը՝ փոխանցելով պետությանը, իսկ նա իր մասնակցությունն ունենա բարեգործական որևէ այլ ծրագրի:

Նշեմ նաև, որ խուսափելու եմ թանկարժեք որևէ նվեր ընդունելուց. եթե որևէ մեկի մոտ նման ցանկություն կա, խնդրում եմ այդ միջոցներով բարեգործական ծրագիր իրականացնել, հակառակ դեպքում՝ այդպիսի նվերները փոխանցելու եմ պետական հաշվեկշիռ»։
© 2020 HAYASTAN.PRO | All Rights Reserved. HAYASTAN.PRO